‘क्षेत्रीय कमिटी, जिल्ला कमिटी र प्रदेश कमिटीले सर्वसम्मत रुपमा मलाई सिफारिस गरेको थियो । पार्टी अध्यक्षले (केपी ओली) पनि राष्ट्रियसभाबाट राजीनामा गर्नू भन्नुभयो, मैले राजीनामा गरेर उम्मेदवारी दिएँ’, भट्टराई भन्छन् ।
रुपन्देही–५ मा नेकपा एमालेका तर्फबाट बासुदेव घिमिरेको उम्मेदवारीलाई निर्वाचन आयोगले मान्यता दिएको छ । यो क्षेत्रमा एमालेका पोलिट्ब्यूरो सदस्य खिमलाल भट्टराईको पनि उम्मेदवारी परेको थियो ।
तर घिमिरेको उम्मेदवारी दर्ता पहिले भएको भन्दै आयोगले उनैलाई मान्यता दियो । आयोगको यो निर्णयले भट्टराई प्रतिनिधिसभा सदस्यको उम्मेदवार बन्न पाएनन् भने उनको राष्ट्रियसभा सदस्य पद पनि गयो । उनले राष्ट्रियसभा सदस्यबाट राजीनामा दिएर प्रतिनिधिसभा सदस्यमा उम्मेदवारी दिएका थिए ।
